مبارزان کمونیست
ڕاگەیاندن:
لیژنەی سلێمانی/ ڕێکخراوی بەدیلی کۆمۆنیستی لە عێڕاق
ئەو حزب و ڕێکخراوانەی کوردستانی ئێران کە لە ئۆردووگاکانی دەورووبەری شاری سلێمانی، واتا لە (زڕگوێز و زڕگوێزەڵە و بانە گەورە)ن، (ئاسایشی گشتی حكومەتی هەرێم) ئاگاداری کردوونەتەوە کە دەبێ ئۆردووگاکانیان چۆڵ بکەن و لە کەمپی ئاوارەکانی (عەربەت) و (سورداش) نیشتەجێ بن.
تا ئێستا ئەم حزب و ڕێکخراوانە لەم ئۆردووگایانەدا هەوڵیانداوە ئاسایشی خۆیان بپارێزن لە دەست ترۆری ڕژێمێک کە هیچ جۆرە ئۆپۆزسیۆنێکی فکری و سیاسی قبوڵ ناکات، و مێژوویەکی هەیە لە پاکتاوکردنی چالاکوانانی سیاسی و فڕاندنی نەیارانی خۆی، بۆیە ڕاگواستنیان بۆ ناو کەمپی ئاوارەکان، ڕاستەوخۆ گیانی ئەندام و کادر و لایەنگرانیان دەخاتەبەر مەترسی ترۆر و فڕاندن.
ساڵی پار (٢٠٢٣) حکومەتی عێڕاق و ئێران، ڕێککەوتننامەیەکیان واژۆ کردووە، بە هاوکاری (حکومەتی هەرێم) و هەردوو حزبە دەسەڵاتدارەکەی، بۆ کۆتایی هێنان بە ئامادەیی و نیشتەجێ بوونی حزب و ڕێکخراوەکانی کوردستانی ئێران، لە هەرێمی کوردستانی عێڕاق، وە لەو پێناوەدا چەندین سەردانی هاوبەشیان بۆ لای یەکتری کردووە، کە دواتریان سەردانی سەرۆکی هەرێم (ئایاری ٢٠٢٤) بۆ تاران و سەردانی سەرپەرشتیاری وەزارەتی دەرەوەی ئێران (عەلی باقری) بوو لە (حوزەیرانی ٢٠٢٤)دا، بۆ بەغدا و هەولێر و سلێمانی، بۆ کۆبوونەوەی لەگەڵ (سەرۆکی هەرێم) و (سەرەک وەزیرانی حکومەتی هەرێم)، و سەرۆکی (پارتی) و سەرۆکی (یەکێتی)، بە مەبەستی گووڕ پێبەخشینی پەروەندەی ڕێککەوتنامە ئەمنیـیەکەی نێوان (تاران- بەغدا- هەولێر).
گواستنەوەی ئەندام و لایەنگر و خانەوادەکانی ئەو حزب و ڕێکخراوانە کە پەنابەری سیاسین نەک ئاوارە، بۆ ناو کەمپی ئاوارەکان و هەڕەشە لێ کردنیان بەوەی کە مۆڵەتی مانەوەیان بۆ تازە ناکرێتەوە، پێشێلکردنی مافی ئازادی سیاسی و مەدەنیـیانە، وە پێچەوانەی هەموو ئەو ڕێککەوتننامە نێودەوڵەتییانەیە سەبارەت بە مافی پەنابەری سیاسی کە دەوڵەتی عێڕاق مۆری کردوون و حکومەتی هەرێمیش پابەندی خۆی ڕاگەیاندووە پێـیانەوە.
گەرچی میدیاکانی لایەنگری حکومەتی هەرێم و هەردوو حزبی دەسەڵات پاساوی ئەوە دەهێننەوە بۆ ئەم ڕێککەوتنامەیە کە گوایە بۆ ڕێگری کردنە لە چالاکی سەربازی لەسەر سنورەکانی هەرێم دژ بە ڕژێمی جمهوری ئیسلامی ئێران، بەڵام لە ڕاستیدا ئەمە بەشێکە لە واقعیەتی حکومەتی هەرێم و هەردوو حزبی دەسەڵاتدار کە ئاگاهانە مانەوەی خۆیان لەو ڕۆڵەدا دەبیننەوە کە پیادەکەری بەرژوەندە جیۆپۆلیتیکیـیەکانی بورژوا ئیسلامی و قەومی دەسەڵاتدار بن لە ئێران و تورکیا و عێڕاق دژ بە جەماوەری زەحمەتکێش و ئازادیخوازی ئەو وڵاتانە.
لیژنەی سلێمانیی ڕێکخراوی بەدیلی کۆمۆنیستی، ئەم هەوڵانە بە پلانێکی مەترسیدار لە باری ئەمنیـیەوە دەبینێت و سەرکۆنەی دەکات، وە بانگەوازی خەڵکی ئازادیخواز لە عێڕاق و هەرێمی کوردستان، ڕێکخراوە کرێکاری و جەماوەری و مەدەنیـیەکان، و کەسایەتی و لایەنە سیاسیـیەکان دەکات، کە هەوڵی خۆیان بخەنەگەڕ بۆ پوچەڵ کردنەوەی ئەم پلانە لە ڕاگواستنی ئۆپۆزسیۆن لە ئۆردووگاکانیانەوە بۆ کەمپەکانی ئاوارەیی. ئۆپۆزسیۆنی ئێران لە هەرێم مافی خۆیەتی ئازادانە کار و چالاکی سیاسی ئەنجام بدات.
پاراستنی ژیان و ئاسایشی ئەم پەنابەرە سیاسیـیانە و ئەم حزب و ڕێکخراوانە لە ئەستۆی هەردوو حکومەتی ناوەند و هەرێم و هەردوو حزبە دەسەڵاتدارەکەیدایە و هەر ڕووداوێکی نەخوازراویش ڕووبدات ئەوان لێی بەرپرسن.
٢٤-٦-٢٠٢٤
