مبارزان کمونیست
هێزی رێکخراوی خەڵکی عێراق ئەتوانێ بەر
بە شەڕی کۆنەپەرستانەی هێزە قەومی و تائفیەکان بگرێت
دوای ئه‌و هێرشه درندانەیەی كه ڕۆژی سێ شه‌ممه هێزه‌كانی سوپای عێراق كردیانه سه‌ر گۆڕه‌پانی مانگرتن له‌قه‌زای حه‌ویجه، شه‌پۆلێكی نوێی توندوتیژی بەشێک لە شاره‌كانی تری عێراق، بەتایبەتی ناوچە” سونە نشینەکان”ی گرتۆتەوە. به‌پێی ئاماره ڕاگەیەنراوەکان تائێستا بە دەیان کەس کوژراون و بەسەدان کەسیش بریندار بوون و دۆخی زۆرێک لەو ناوچانەش تێکچوون. فەزای جەنگ باڵی کێشاوە بە سەر ژیان و گوزەرانی خەڵکی ئەو ناوچانەدا و بارودۆخەکە بەرەو ئەوە دەچێت کە شەڕێکی ناوخۆی سەراپاگیر لە نێوان لایەنە قەومی و ئیسلامی‌و تایفیەکانی عێراقدا بەرپابێت. شەڕێك کە هیچ پەیوەندی بە بەرژەوەندی خەڵکی عێراقەوە نییە، بەڵکو لەسەر چۆنیەتی پێکهێنانەوە و ئارایشدانەوەی دەوڵەت و دەسەڵاتی بۆرژوازیە لەعێراقدا.
مالکی و دەوڵەتی یاسا، بەپێی ڕۆڵ و پشکی زۆرتری لە حکومەتدا و بەو پێیەی زۆربەی جومگە سەرەکیەکانی حکومەت و سوپا و ئاسایش و پۆلیس و دارایی و زۆربەی دامودەزگا گرنگەکانی خستۆتە ژێردەستی خۆی، بە پشتیوانی ئێران، دەیەوێت پرۆسەی سازدانەوەی دەوڵەتی بۆرژوایی لە عێراق لە دەستی خۆیدا مسۆگەربکات و بەم جۆرەش هەولەکانی خۆی بۆ ناوەندکرندن و فروانتر کردنی نفوزی دەسەڵاتی چرتر بکاتەوە و لایەنە نەیارەکانی خۆی کەنار بخات. بەکارهێنانی سوپا لە لایەن حکومەتی مالکیەوە بەرامبەر بە نەیارە سیاسیەکانی و بەرامبەر بە خۆپیشاندەران بەجیا لەوەی توندوتیژیەکان دەباتە ئاستێکی مەترسیدارتر، سەرەتایەکی خەتەرناکە لە ململانێی سیاسیدا و خوڵقاندنی دۆخێکی تازەیە لە کێبەرکێی دەسەڵاتدا، هەوڵێکیشە بۆ توندکردنەوەی فەزای تۆقاندن و ترس و داسەپاندنی سەرکوتی سیاسی لە ئاستی کۆمەڵگای عێراقدا.
ناسیونالیزمی کوردیش بە دیاریکراوی”پارتی‌و یەکێتی” لە هەوڵی ئەوەدان کە لەم دۆخە شێواوە بە قازانجی خۆیان کەڵك وەربگرن، لەسەر بنەمای جەنگ و بەیەکدادانی قەومی و تایفی لە عێراقدا پشک و بەشی سیاسی خۆیان بپارێزن و دەسەڵاتی چەوسێنەرانە و نایەکسانی بۆرژوازی کورد بەسەر سەری کرێکارو زەحمەتکێشی کوردستاندا درێژبکەنەوە. لەم ڕوەوە پڕوپاگەندەی نەتەوەیی‌‌‌و کۆنەپەرستانە بەرێدەخەن بەمەبەستی چەواشەکردنی خەڵکی کوردستان‌‌و بە ترس لە دەسەڵاتی مالیکی، لەدەوری خۆیان کۆبکەنەوە و بیانکەنە زەخیرەی هەر کێشمەکێشێکی داهاتوویان لەگەڵ دەسەڵاتی ناوەندی و مالکی بۆ بەرژەوەندیەکانی خۆیان.
بە پێچەوانەی پارتی و یەکێتی، خەڵکی کوردستان، هیچ بەرژەوەندیەکیان لەو جەنگ و ململانێیەدا نییە، بۆیە نابێ بە هیچ جۆرێك رێگایان پێبدەن رایانبکێشنە ناو ئەو شەڕو جەنگەی ئێستا بەرپابووە. خەڵکی کوردستان بەرژەوەندی سیاسی لەوەدایە کە هەرچی زوترە ریزو ئاسۆی سیاسی خۆیان لە ریزو ئاسۆی سیاسی بزوتنەوەی کوردایەتی جیا بکەنەوە لە ململانێ‌و کێشەیاندا لەگەڵ هێزەکانی بۆرژوازی عێراقی بە ناسیۆنالیست‌و ئیسلامیەوە. پێویستە سەنگەری خەباتیان لەدژی دەسەڵاتی بزوتنەوەی ناسیونالیسی‌و بۆرژوازی کورد، لەدەوری ئاسۆی سۆشیالیستی چینی کرێکار گەرم رابگرن، بەریزی یەکگرتوانەو رێکخراویان بۆ بنیاتنانی دەسەڵاتی جەماوەری‌و کۆمەڵگایەکی ئازاد و خۆشگوزەران، تێبکۆشن. ئەمەش زامنی دەستکۆتاکردنی هەرەشە و ترسی دەسەڵاتی ناوەندییە لە خەڵکی کوردستان و ئایندەکەی.
خەڵکی ئازادیخوازی کوردستان و حزبی کۆمۆنیستی کرێکاریی کوردستان ڕێگا نادەن یەکێتی و پارتی خەڵکی کوردستان ڕابپێچنە ناو ئاگری شەڕێکی قەوی و تایفیەوە. هەروەها حیزبی کۆمۆنیستی کرێکاری کوردستان لە کاتێکدا لەپاڵ حیزبی کۆمۆنیستی کرێکاری عێرقدا بەرامبەر بەم بارودۆخە جەنگیە رادەوەستێ، بانگەوازی کرێکاران‌و زەحمەتکیشان‌و سەرجەم ئازایخوازانی عێراق دەکات کە لەبەرامبەر ئەم فەزا جەنگی‌و شەڕە کۆنەپەرستانەیەدا بەریزی یەکگرتوویان راوەستن بۆ بەشکست کێشانی هەموو لایەنە نەتەوەپەرست و ئیسلامیە ڕەنگاورەنگەکانەوە.
حزبی کۆمۆنیستی کرێکاریی کوردستان
٢٥/٤/٢٠١٣
—
Shukak Abdulstar
Skrtaryaty Maktaby Syasy
00964 770 76 79 334 – 7\24
00964 (0)53 320 89 31 -2 :00 pm — 500 pm (Bagh. )
