بۆپێشەوە بەرەو هەرچی زیاتر ڕێکخراو بوون
لەچەند ڕۆژی ڕابردوودا مامۆستایان، کارمەندان و کرێکارانی خەستەخانەکان، کارەبا و زوربەی بەشە خزمەتگوزاریەکانی کەرتی دەوڵەتی، جارێکی تر هاتنەوە مەیدان، بە مانگرتن و خۆپێشاندان، دژی سیاسەتی بەزۆر داسەپاوی “پاشەکەوتی موچە” و دەربڕینی ناڕەزایەتی، دژی هەردوو دەسەڵاتی حکومەتی هەرێم و حکومەتی ناوەند کە موچە و بژێوی خەڵکی کوردستانیان کردۆتە بارمتەی کێشمەکێشەکانی نێوان خۆیان.
ئەم شەپۆلە لە ناڕەزایەتی لەم دەورەیەدا پێشکەوتن و قوڵبونەوەیەکی بەخۆیەوە بینی لایەک بە بەشداری بەرفراوانی ژنان و لاوانی بێکار و توڕە، وە لایەکی تریشەوە بە سەراسەری بوونەوەی، کە لەگەڵ زەبروزەنگ و سەرکوتگەری “پارتی”یشدا بەڵام شار و شارۆچکەکانی ژێر دەسەڵاتی ئەویشی گرتەوە.
نەک هەر ئەوەش بەڵکو لەناو دڵی ئەم ناڕەزایەتیانەشدا کارمەندان و کرێکارانی کەرتی کارەبا بە دەستپێشکەری هەڵسوڕاوانێکی لەخۆبردوو “ڕێکخراوی سەربەخۆی کارەبا”یان ڕاگەیاند و هەروەها ڕێخکراوە جۆراوجۆرەکانی ناو خەستەخانەکانیش هاوئاهەنگیان لە نێوان خۆیاندا دروستکردوە بەهێنانەدی ئۆڕگانێک بەناوی “بۆردی ڕێکخراوەکانی خەستەخانە”، بەم شێوەیە لە ناو دڵی ناڕەزایەتیەکان و پەرەسەندنیدا وەک بزوتنەوەیەک، کرێکاران و کارمەندانی کەرتە جۆراوجۆرەکان هەرچی زیاتر پەیانبردوە بە پێویستی ڕێکخراوبوونی سەربەخۆی خۆیان و هەنگاوی عەمەلیان بۆی ناوە.
هاوڕێیانی “ناوەندی خەبات” چالاکانە لەم ناڕەزایەتیانەدا ڕۆڵیان بینیوە نەک هەر لە گەرم ڕاگرتنی خۆپێشاندانەکان و بەرفراوانکردنی مانگرتنەکان و ڕادیکاڵ کردنەوەیان بەڵکو بۆ هەرچی زیاتر ڕێکخراودنیشیان لەڕێگەی دەستبەکار بوونی خۆیان و هاوکاریکردنی هەڵسوڕاوانی کرێکاری و کارمەندانی کەرتە جۆراوجۆرەکانی خزمەتگوزراریە دەوڵەتیەکانیشەوە.
ئەم پێشڕەویە و قوڵبونەوەیە لە ناڕەزایەتیەکاندا پێویستی بە بەردەوامی هەیە تا ڕێکخراوە سەربەخۆکان لە زوربەی کەرتە جیاجیاکاندا دێنەدی و لێرەوەش پێشڕەوان و هەڵسوڕاوانی کرێکاری و سۆشیالیست پێویستە بە ئاسۆی گرێدانەوەی ئەو ڕێخکراوە کرێکاری و جەماوەریانەیانەوە هەنگاو هەڵێننەوە بۆ هێنانەدی یەکیەتیەکی سەراسەری لە ئاستی هەرێمی کوردستان و پەیوەستکردنەوەشی بە ڕێکخراوە کرێکاری و جەماوەریە سەربەخۆ و خەباتکارەکانی هاوچینەکانیان لە ناوەڕاست و خواروی عێڕاق.
ئەوە هاوپشتی و یەکگرتووییەکی چینایەتی سەراسەریە هەم لە کوردستان و هەم لە عێراقدا کە دەتوانێت چۆک دابدات بە هەردووی ئەم دەسەڵاتە گەندەڵە دژی کرێکاری و سەرو خەڵکیەی کە بە سەرکوتی ئازادی و مافە ڕەواکانی خەڵکی کوردستان و عێڕاق توانیویانە دەسەڵاتی خۆیان ڕاگرن.
هێز لە ڕێکخراوبوونماندایە
بۆ پێشەوە بەرەو هەرچی زیاتر ڕێکخراو بوون
بژی ئازادی ڕێکخراو بوون.
ناوەندی خەباتی کرێکاری و جەماوەری لە کوردستان
30-3-2018
